Back to Black

08أغسطس08

وأخيراً رجعت اكتب في المدونه ، صارلي اكثر من شهر ماكتبت شي فيها ، كان ودي اكتب شي وانا مسافر بس قلت خليها لما ارجع الكويت ، وهذا انا رجعت الكويت وناوي ارجع اكتب بشكل متواصل في المدونه.

قضيت اجازه ممتعه رحت فيها لـ الاردن ، سوريا و لبنان ، الاردن كانت حلوه والجو البارد والمنعش كان من اكثر الاشياء اللي حبيتها ، خصوصاً للخليجيين مثلي اللي عايشين بحر طوال السنه الا اشهر معدوده ، بس للأسف مارحت اماكن كثيره ولا زرت الاماكن التاريخيه والطبيعيه ، فقط قعدت في عمّان واتنقل من سوق الى سوق ومن سينما الى سينما أخرى ! .

اما سوريا ، قضيت فيها ثلاث ساعات فقط ، لأنها كانت في الطريق بين الاردن ولبنان ، ووقفنا في سوق الحميديه عليان نتسوق ! ، كرهت نفسي بهالثلاث ساعات ، سوق من اسوء مايكون وزحمه مو طبيعيه ، وتحت حراره اشعه الشمس الحارقه ، بصراحه وبدون مبالغه يمكن هذي اسوء ثلاثه ساعات قضيتها بحياتي مع احترامي للسوريين ، ولكن السوق كان فعلاً سيء والمكان كله سيء -_-”

اما لبنان ، فهذي قصه أخرى ، اكثر شي استمتعت فيه بالسفره ، مع اني قضيت فيها اربعه ايام فقط ! رحت لمغاره جعيتا ، شي خيال وغريب سبحان الله ، وهي مرشحه انها تكون واحده من عجائب الدنيا السبع الجديده ، وبرأيي تستحق انها تكون من عجائب الدنيا السبع الجديده ، وركبت التلفريك ، من زمان كان نفسي اركبه واخيراً ركبته ، كان ممتع كثير بصراحه ، خصوصاً المنظر ” كان عند الغروب تقريباً ” والبحر ، كان شي رائع بصراحه ، واكيد ماقدرت اطلع من لبنان الا وانا رايح لشارع السوليدير ، واللي صاروا كل المغنيين يصورون اغانيهم فيه (( كثير بس ناسيهم ، اللي متذكره على ما اعتقد هو راشد الماجد بأغنيته علشان الحب )) .

وبعدها رجعت للكويت ، وطبعاً الرجوع للوطن احلى شي في النهايه ، حاس اني تكلمت كثير عن تفاصيل مالها داعي ، عموماً بسوي سلسله تدوينات اكتب فيها عن الافلام اللي شفتها ، الالعاب اللي لعبتها ، القصص اللي قرأتها ، واشياء ثانيه غيرها ، فأنتظروني P: ، وبعد غيرت الستايل تزامناً مع عودتي و كـ نوع من التجديد ، مو مقتنع فيه كثير بس يكفي لفتره من الوقت ، ويمكن يصير يعجبني بالنهايه

Filed under: Uncategorized   |  2 Comments